Die vakgroep Geografie- onderwys en Omgewingsopvoeding, is ’n dinamiese en lewendige groep binne die Skool vir Wiskunde, Wetenskap en Tegnologie vir Onderwys. Ons doel is om ’n hoë standaard van onderwysersopleiding te verskaf om ons studente te bemagtig met die kennis, vaardighede en waardes wat nodig is om meesters van hulle professie te word.

Die vak Geografie in die voorgraadse BEd-program bied ’n wye reeks temas wat spesiaal uitgesoek is om die geografie in te sluit wat nodig is om die skoolkurrikulum te dek.

Temas:

• Afrika en Suid-Afrika (fisiese, ekonomiese en bevolkingsgeografie), planetêre geografie, klimatologie en oseanografie
• Nedersettingsgeografie, basiese geomorfologie, ekonomiese geografie, omgewingsgeografie
• Gevorderde bevolkings- en stedelike geografie, gevorderde geomorfologie en klimatologie, vakmetodiek en metodologie, kaartwerk, digitale geografie (GIS, GPS, ens.) en lugfotografie

Nagraadse temas en navorsingfokus hoofsaaklik binne die veld van Onderwysgeografie: Filosofie en metodologie in geografie-onderrig, onderrig- en leervaardighede in geografie, selfgerigte leer, aktiewe leer en leerdergesentreerde onderrig (praktiese onderrig) in geografie-onderrig, die integrasie van verskeie ICT’s in geografie-onderrig, digitale geografie en georuimtelike tegnologie in geografie-onderrig en omgewingsonderrig.

Die vakgroep Rekenaarwetenskaponderwys is verantwoordelik vir die opleiding van onderwysstudente deur middel van die Baccalaureus Educationis (BEd) graad en Nagraadse Onderwyssertifikaat (NGOS) in die vakke Inligtingstegnologie-onderwys en Rekenaartoepassingstegnologie-onderwys. Geen spesifieke voorvereistes word gestel vir voornemende eerstejaarstudente wat hulself in hierdie vakrigtings, waarin daar ’n groot tekort aan opgeleide onderwysers is, wil bekwaam nie. Onderrig word ook op honneurs-, magister- en doktorale vlakke in hierdie vakke verskaf.

Die vakgroep neem verantwoordelikheid vir rekenaargeletterdheidsmodules en modules aangaande die integrasie van tegnologie in die onderwys, in die BEd, ACT, ADE en ADT programme wat ook op afstandmodus aangebied word.

Verder, is alle personeel verbonde aan die vakgroep aktiewe navorsers in die Selfgerigte-leer (SDL) fokusarea. Personeel het reeds verskeie artikels in geakkrediteerde tydskrifte nasionaal en internasionaal gepubliseer, om die onderrg-leer van studente te verbeter. Personeel is ook aktief betrokke by die lewering van referate op akademiese kongresse.

Die program is gemik op voornemende onderwysers wat ’n gefokusde onderwysgraad wil verkry wat hulle met die basiese kennis en teoretiese begronding sal toerus om hulle in staat te stel om Elektriese Tegnologie, Meganiese Tegnologie, Siviele Tegnologie, Ingenieurstekening en -ontwerp te onderrig, asook die vak Tegnologie binne die konteks van die Nasionale Kurrikulum- en Assesseringsbeleidsverklaring (KABV).

In ooreenstemming met die verwikkelinge in die Departement van Basiese Onderwys rakende die spesialisering in die verskillende tegnologievakgroepe het die Vakgroep Tegnologie ook daarby aangepas en kan die spesialiserings soos volg aanbied: Elektriese Tegnologie (Elektronika en Elektrisiënswerk); Meganiese Tegnologie (Motorwerktuigkunde, Pas- en Draaiwerk, Sweis en Metaalwerk) en Siviele Tegnologie (Houtwerk, Boukonstruksie en Siviele Dienste).

Navorsing in die vakgroep fokus veral op die ontwikkeling en verbetering van die onderrig in Tegnologie op skoolvlak asook in tersiêre opleiding.  Personeel is aktief betrokke by nagraadse studies of by studieleiding aan nagraadse studente. Referate wat by internasionale en nasionale konferensies gelewer word en artikels wat gepubliseer word, is deel van die groep se uitsette.